21-oktabr — O‘zbek tili bayrami kuni muborak bo‘lsin!

21-oktabr — O‘zbek tili bayrami kuni muborak bo‘lsin!
Aziz yurtdoshlar, hurmatli hamkasblar!
Sizlarni milliy o‘zligimiz va ma’naviyatimiz timsoli bo‘lgan ona tilimizga ehtirom ayyomi — O‘zbek tili bayrami kuni bilan chin qalbimdan tabriklayman.

🔸Ona tili — xalqning tarixi, tafakkuri va bebaho ma’naviy boyligini avloddan avlodga yetkazuvchi ulug‘ ne’matdir. Vatanga muhabbat, milliy qadriyatlarga hurmat va ajdodlar merosiga sadoqat, avvalo, ona tiliga bo‘lgan mehrdan boshlanadi.
Alisher Navoiy singari buyuk ajdodlarimiz ijodi bilan sayqal topgan o‘zbek tilining boyligi va ifoda imkoniyatlarini asrab-avaylash, uni ilm-fan va kasbiy faoliyatimizda munosib qo‘llash har birimizning sharafli burchimizdir.

🌱 Qishloq xo‘jaligi, o‘simliklarni biologik himoya qilish va ilmiy izlanishlar sohasida ham davlat tilining mavqeyini mustahkamlash alohida ahamiyatga ega. Sohaga oid atamalarni aniq va to‘g‘ri qo‘llash, hujjatlarni savodli yuritish, ilmiy hamda amaliy bilimlarni ona tilimizda ravon yetkazish kasbiy madaniyatimizning ajralmas qismidir.

✅“Biosifat” Respublika markazi jamoasi uchun ham ona tilimizga hurmat — kundalik ishimizda, o‘zaro muloqotimizda va xalqimizga xizmat qilish mas’uliyatimizda namoyon bo‘lishi lozim bo‘lgan yuksak qadriyatdir.

✨Tilimizning sofligi va boyligini asrashga, yosh avlod qalbida ona tiliga mehr uyg‘otishga har birimiz o‘z hissamizni qo‘shaylik.

Barchangizga mustahkam sog‘lik, oilaviy farovonlik va ezgu ishlaringizda muvaffaqiyatlar tilayman.
Ona tilimizning qadri yuksak, umri boqiy bo‘lsin!